India Republic Day Ah Khrihfa Hla “Abide With Me” An Chuah (Play) Ti Lai Lo

India Republic Day hmannak i a donghnak kharnak caah Brass band pawl nih an play tawnmi, Khrihfa hla “Abide With Me” (Ka Bawipa rak ka umpi ko) timi cu tukum thokin an chuah (play) ti lai lo. Mah aiawh ah India National Song “ Vande Mataram” timi hla an chuah (play) cang lai.

“Abide With Me” hi mirang hla ( English Hymn) a si. Khrihfa hla ttha le hla lar taktak a si. India Miphun PA bik Mahatma Gandhi  nih a duhbik mi hla a si tiah an chim tawn. Cu hlan i an rak tuah tawnning  ahcun Delhi ah Vijay Chowk hmun ah India Republic Day lawmhnak a donghnak kharnak caah an chuah tawnmi a si.

Sihmanhsehlaw, tukum thok in cun Defence Ministry nihcun hi hla aiawh ahhin hla dang an chuah cang lai tiah a chim. Official in thanh an tuah rih lo nain India media pawl nihcun hi kong hi an ttial duh ngaimi ah a cang.

Ministry official cheukhat  pawl nihcun kum chiar in hla cheukhat hi an hlonh i a thar an chuah tawn tiin an chim. India hla thluk le anmah hla an chuah duh ruangah “Abide With Me” hi an hlonhnak a si tiah an chim.

Kum 2018 ahkhan hla fung 26 an chuah (play) mi chungah fung 25 hi anmah India miphun pawl nih an phuahmi hla a si. “Abide With Me” lawng hi mirang hla an chuahmi a si. Nikum zong ahkhan “ Abide With Me” hla lawng hi ramdang hla an chuahmi umchun cu a si. Tukum tu ahcun hi hla hi an hlonh zumh a si.

Leave a Reply

Your email address will not be published. Required fields are marked *